Daghang Pinoy ang gustong moadto sa nasud sa Amerika kinsa kasagaran kanila gustong manarbaho didto aron mahaw-as sa kalisod, gawas lang niadtong mga adunahan kinsa moadto sa maong lugar aron lang mobakasyon o maglulinghayaw.
Sa 888 News Forum nga gipahigayon kagahapon sa buntag sa Water Front Hotel, Lahug niining dakbayan gituki ni US Consul John Domingo ang kabahin sa pagkuha og US Visa.
Gitataw niini nga ang US nagkinahanglan og mga tawo nga mobisita sa maong nasud, sama usab sa Pilipinas nga nagkinahanglan usab og mga turista aron mapun-an ang abot sa panudlanan sa gobiyerno.
Matud ni Domingo nga usa sila ka Consulate Agency ug ang gustong mokuha og visa mo-“ log-on” lang sa “website” sa ilang konsulada aron makakuha og giya bahin sa mga requirements sa pagkuha og visa.
Gibutyag niya nga daghang mokuha og visa nga mapakyas tungod kay dili kini kwalipikado.
Ang makapakyas sa usa ka aplikante og visa mao ang makapaduda nga “financial status” niini, mini ang iyang dokumento, ug may kasong criminal nga giatubang.
Si Domingo nagkanayon nga susihon gyud sa consul kun ang usa ka aplikante og visa siguro bang mopauli og balik nganhi sa nasud aron dili na madugangan ang kapin 11 milyones ka mga ilegal nga immigrant ang atoa karon sa US.
Ang mokuha usab og visa kinahanglang presentable og uban sa haom nga senina, ug maayong manubag sa panahon sa interview.
Ang paghatag og visa dili magtan-aw sa matang sa pagkatawo sa aplikante apan ang importante mao nga mapamatud-an siya nga kasigurohan ang financial status niini ug kompleto usab sa mga requirements nga gikinahanglan.