Gatusan ka pamilya wad-an og panimalay

Gatusan ka pamilya sa amihang kalungsoran sa lalawigan sa Sugbu  nawad-an sa ilang panimalay human moigo ang bagyong Frank niadtong miaging Domingo.

Si   Etrellita Escañan,   provincial coordinator sa  Cebu Provincial Disaster and Coordinating Council    nga nahinabi sa Banat News miingon nga lakip sa nangaguba mao ang kadalanan sa kabarangayan sa amihanang kalungsoran.

Subay sa ilang pakisusi nga gihimo maoy ilang nasuta nga sa  sitio Malucboc ug sitio Bantigue sa barangay Agujo sa Daanbantayan  napadpad sa kusog nga hangin ang 30 ka mga balay ug 20 usab niini sa barangay Bitoon sa mao gihapong lungsod.

Laing 15 ka mga balay ang nangaguba sa   barangay Paypay ug 150 usab sa barangay Baclayan nga nakasinatig kadaot ug ang 30 niini ang “totally damaged”.

Dugang mga balay nga nangaguba sa lungsod sa San Remegio diin mokabat sa 30 ka pamilya ang nawad-an sa ilang pinuy-anan ug dugang 73 niini ang nakabaton og grabeng kadaot sa dihang natumba ang dakong punoan sa kahoy lakip na sa tulo ka mga classroom sa tulunghaan sa maong dapit.