Negosyo sa Talisay apektado sa bagyo

Daghang naapektohang negosyo sa Talisay City gumikan sa pagkaputol sa sugang dagitabnon agi'g sangputanan sa bagyong Frank.

Ang Barangay Poblacion, ning maong dakbayan nawagtangan sa kuryente sukad pa niadtong Sabado sa buntag ug hangtud sa oras niining pagbalita wala pa gihapon sila'y suga.

Lakip sa naapektohan ang Police Station sa dakbayan hinungdan nga  dili sila makapasa sa ilang mga report ngadto sa provincial headquarters.

Apan base sa blotter sa kapolisan wala'y nahitabong dagkong insidente atol sa pagkuso-kuso sa bagyong Frank.

Kagahapon sa buntag ang mga sakop sa Visayan Electric Company  nagsubay sa mga poste diha sa dakbayan ug ilang gipaningkamotan nga mauli dayon ang linya sa kuryente.

Ang kadalanan sa dakbayan ilabi na diha sa Poblacion  napuno sa mga dahon nga nangalarag gikan sa mga punoan sa kahoy ug nagkapuliki  ang mga residente sa lugar sa paghipos sa mga sagbot.

Bisan nilurang na ang bagyo dagko gihapon ang bawod sa dagat nga nakahatag  og kabalaka sa mga namuyo daplin sa baybayon ilabi na sa mga nawagtangan og mga balay, apan walay natala nga nadisgrasya sa maong bagyo.

Sa laing bahin, ang hepe sa Talisay City Social Welfare, Felipa Solana mibutyag sa Banat News kagahapon nga bugas maoy ilang nahatag dayong hinabang sa mga naapektohan sa bagyo.

Karong adlawa mosumiter sila og report ngadto kang Mayor Socrates Fernandez aron ang konseho makagama og resolusyon alang sa paghatag og hinabang nga salapi ngadto sa  mga pamilya kansang mga balay nangabungkag sa hingpit  ug ang gagmay ra og guba.

Si Solana midugang nga karong adlawa usab mosumiter sila og hangyo ngadto sa buhatan sa Department of Social Welfare and Development sa rehiyon aron ang mga apektadong pamilya  mahatagan usab og hinabang .

Mikabat sa 56 ka balay ang gagmay ra og guba, ug 13 ang hingpit gyung nabungkag sa mga barangay Lawaan III, Dumlog, ug Poblacion base sa natala sa buhatan sa  social welfare sa Talisay.