Barko gihangyo ngapabalikon kaybagyo

Barkong nalunod gihangyo untang pabalikon sa pantalan sa anak sa usa sa mga magtiayong pasahero sa nalunod karong MV Princess of the Star diha sa Sibuyan Island sa kadagatan sa lungsod sa San Fernando.

Nagminatay sa paghilak ug pagpangayo og eksplinasyon gikan sa kadagkoan sa Sulpicio Lines kagahapon diha mismo sulod sa buhatan niini sa Pier 3 si Teresa Hiyas, 40, nga taga Maribago dakbayan sa Lapulapu.

Si Hiyas inubanan sa iyang banang si Romeo ug igsuong si Anabelle nga diha nakigpunsisok uban sa mga kabanay sa uban pang mga pasahero diha sa maong buhatan kagahapon.

Si Hiyas sa pakighinabi sa Banat News nga sakay ang ilang ginikanang sila si Rogelio Alipin ug Petra Alipin sa maong barko gani mi-text pa kini kaniya nianang alas 8 sa buntag niadtong Sabado nga i-ampo sila.

“Ni-text pa sila 8 in the morning asking us to pray for them kay nasugatan daw nila ang bagyo. Giingnan nako sila (PCG ug Sulpicio) nga pugngan ang barko kay signal number 3 ang bagyo, naa ang akong mama ug papa didto,”  asoy pang Hiyas nga nag-hysteria kagahapon diha sa maong buhatan.

Apan gikatahong wala paminawa sa PCG ang iyang hangyo hinungdan nga adto siya mitawag sa hotline sa maong shipping lines apan sa gihapon gikatahong giingnan siyang maayo ra ang paglawig sa barko ug gikatakdang modunggo kini sa Sugbu alas 5 pasado niadtong Sabado sa hapon.

Samtang usa ka amahan sa usa sa mga crew sa maong barko nidemandang kinahanglang hatagan sila sa tinuuray nga sitwasyon sa mga pasahero buhi man o patay.

“Prangka lang gud unta ba, nga mao ni mga tawhana ang naluwas mao ni ang patay aron mahibaw-an nato di nalang tago-tagoan,” masuk-anong gipamulong sa amahan sa maong crew (ngan gipugngan).

Ang Port Captain sa Sulpicio Lines nga si Captain Nestor Ponteres sa pakighinabi sa Banat News kagahapon nagkanayon nga magdepende sa kapitan kung mohinayon kini og biyahe o dili bisan og bagyo.

Nasayran nga niadtong adlawa ang tanang barkong may gibug-aton lang nga moubos sa 2 mil toneladas wala tuguting makalarga dinhi sa Sugbu kini bisan signal no.1 lang sa siyudad samtang signal no.2 sa amihanan, apan ang Princess of the Stars may gibug-atong kapin sa 23 mil toneladas.

Matud pang Ponteres nakabiya na ang barko dihang nasugatan ang bagyong Frank diha sa Romblon.(Edwin Ian Melecio)