Walay plano nga moluwat sa katungdanan ang SK chairperson sa usa sa mga barangay ning dakbayan sa Sugbu nga namabdos taliwa sa iyang linghod nga pangidaron.
Kini maoy gipahibawo ni SK Federation president Rengelle Pelayo, human usab mopadala og suwat kaniya ang hingtungdang SK chairperson.
Tungod niini niingon si Pelayo nga magtigom karong adlawa ang mga opisyal sa SK Federation aron usab sa pagluwat og opisyal nga baruganan.
Una nang mihatag og usa ka semana nga tagal ang Ombudsman Visayas sa maong opisyal aron sa pagdesider kung kini mupadayon ba sa serbisyo.
Kini dihang gipatawag sa anti-graft office ang 17 anyos nga SK chairperson niadtong miaging semana tungod usab sa reklamo nga nadawat sa maong buhatan.
Ang Ombudsman Visayas giingong mohimo lang og imbestigasyon batok sa SK chairperson nga upat ka buwan nang mabdos, kung kini dili moluwat sa katungdanan.
Nasayran nga namahayag nang daan ang Department of Interior and Local Government ug ang Civil Service Commission nga immoral ang nahimo sa maong opisyal.
Apan midapig ang mismong SK national president nga si Jane Censoria Cajes kaniya sa pag-ingon nga wala sa SK by laws nga taktakon sa katungdanan ang napamabdosang opisyal kini bisan wala pay bana.
Matud ni Cajes nga mahimo gihapong mopadayon sa pagserbisyo ang maong opisyal basta dili babag ang iyang pagmabdos ug makahimo gihapong motambong sa ilang regular nga tigom ug sa uban niining mga gimbuhaton.
Gipadayag sa barangay kapitan sa maong barangay nga wala nay tambong-tambong ang ilang SK chairperson sa nakalabay nilang sesyon.
Kini giingong wala usab mo-duty sa ilang barangay sa adlaw nga gisangon kaniya, human ipatawag sa Ombudsman sa miaging semana.