Duha ‘pushers’ nadakpan

Duha ka gidudahang mga drug pushers ang nadakpan atol sa buybust operation nga gilusad sa Philippine Drug Enforcement Agency-7 diha sa sitio Wakwak sa barangay Sawang-Calero niadtong Huwebes sa gabii.

Ang nangadakpan giilang sila si Dennis Delima, 18, ug Dante dela Peña, 31, pulos mga residente sa maong dapit kinsa gisumbong sa mga silingan nga maoy tigpayuhot og iligal nga drugas diha sa ilang lugar.

Ang grupo ni IO1 Baby Earl Rallos nga maoy nasumbungan sa mga residente niadtong milabay’ng semana mipahigayon dayon og surveillance operation batok sa mga suspek.

Niadtong Huwebes sa gabii si Rallos maoy mibarog nga poseur buyer ginamit ang P300 nga kwarta aron pagpalit og usa ka paketeng shabu gikan kang Delima kinsa gikuyogan ni Peña.

Human matunol ang drugas daling gidakop ang duha ug nakuhaan og dugang duha ka paketeng may sulod nga shabu si Delima diha sa iyang posesyon samtang tulo usab ka paketeng shabu ang nakuha gikan kang dela Peña.

Kasong paglapas sa Section 5 sa Article II sa RA 9165 ang gikatakdang ipasaka batok kanilang duha.