Pito ka mga batan-on nga nag-inom sa dalan gipamusil sa tulo ka mga tawo nga nagsakay og motorsiklo didto sa Sitio Punta Rizal, barangay Pajo dakbayan sa Lapulapu kagahapon sa kaadlawon.
Apan usa ray naigo nga mao si Cristian Escala, 16, ulitawo ug residente sa maong dapit ug lumad sa Libho, Tabogon, Cebu, usa ka tinun-an sa high school.
Base sa imbestigasyon ni SPO2 Rolito Jumao-as nasayran nga samtang nag-inom ang biktima sa dalan uban ang iyang unom ka mga barkada kalit lamang miabot ang tulo ka mga batan-on diin usa kanila mikanaog ug dayong pamusil ngadto kanila hinungdan sa ilang pagkatibulaag.
Si Escala nga maoy duol sa nahimutangan sa suspek maoy naigo sa likod ug hawak ug gidala kini ngadto sa Lapulapu District Hospital ug gibalhin ngadto sa Vicente Sotto Memorial Medical Center.
Matud pa ni Jumao-as ila pang himoan og dugang imbestigasyon sa maong hitabo aron masuta kun unsay motibo sa mga namusil niini ngadto sa mga batan-on, wala usab nila gisalikway nga aduna kini kalambigitan sa fraternity.