Dakbayan sa Sugbu magsaulog sa birthday ni Dr. Rizal

Miduyog ang kagamhanan sa dakbayan sa Sugbo sa paghandom ug pagtimaan sa adlaw nga natawhan ni Doctor Jose Rizal karong adlawa.
 Ang nasudnong bayani ang natawo niadtong Hunyo 19, 1861 ug karong adlawa mao na ang ika-147 nga kasumaran niini.

Matud sa chairman sa Cultural and Historical Affairs Committee sa City Council, konsehal Arsenio Pacaña nga angayan lang handumon ang pagkatawo ni Rizal.

 Kini aron dili makalimtan ang mga hiyas ug talagsaong mithi niini sama sa iyang kaandam sa pagpakamatay alang sa kagawasan sa nasud.
Gipadayag ni Pacaña nga bisan og gawasnon na ang Pilipinas gikan sa pagsakop sa ubang kanasuran, apan giingong nagpabilin gihapon kining ulipon sa nagkadaiyang problema.

 Alang sa konsehal nga ang paghandom sa adlaw’ng natawhan ni Rizal maoy usa ka pagpukaw sa katawhan ilabi na sa kabatan-onan nga makahinumdum sa bayanihong mga buhat niini.

Giingong simple lang hinoon ang paghandom sa city government sa ika-147 nga birthday ni Rizal, apan kini gihulagway ni Pacaña nga makahuluganon.

Kini sugdan sa alas 7:30 sa buntag pinaagi sa usa ka ecumenical prayer nga ipahigayon diha sa Rizal Memorial Library and Museum sa Osmeña Boulevard ning siyudad.

Human niini isunod ang floral offering ngadto sa munomento sa nasudnong bayani diha sa nahisgutang dapit.

Lakip sa gipaabot nga mopadangat og mensahe atol sa programa mao si Bise Mayor Michael Rama ingon man si Mayor Tomas Osmeña.

Samtang ang Knights of Rizal Cebu City Chapter Commander nga si Romualdo Generalao mao usab ang moasoy sa pagkatawo sa nasudnong bayani.

  Si Doctor Jose Rizal gipatay niadtong Disyembre 30, 1896 sa mga Katsila pinaagi sa firing squad diha sa dapit nga gibarugan karon sa Rizal Park, Manila.