61-anyos gibuwagan, naghikog

Nagpakamatay ang usa ka 61-anyos nga lalaki tungod sa iyang gibati nga kaguol human gibiyaan ug gibuwagan kini sa iyang kaugalingong asawa.

Ang biktima giila sa kapolisan nga si Ambrocio Baran, 61, minyo ug molupyo sa Sitio Daneko, barangay Guadalupe, siyudad sa Carcar.

Matud ni SPO1 Zacarias Cabaluna sa Carcar City Police Station sa  dihang nahinabi sa Banat News, ang anak sa biktima nga si Glenn Baran maoy nakadiskobre sa patay’ng lawas sa iyang amahan nianang pagka alas 5 sa buntag niadtong Domingo.

Sa dihang gisusi ni Baran ang patay’ng lawas sa iyang amahan nga nagbuy-od sulod sa ilang balay nasuta niini nga duna kini samad dinunggaban sa iyang dughan gamit ang usa ka hait nga kutsilyo nga gibanabanang walo ka pulgada ang gitas-on.

Subay sa inisyal nga imbestigasyon sa kapolisan gikan sa mga tagtungod sa biktima namatikdan nga kanunay na lang kining maguol human kini gibiyaan sa iyang asawa pipila ka mga bulan na ang milabay.

Dugang nahipos nga kasayuran sa gihimong pakisusi sa kapulisan nga ang biktima nag-antos kini sa sakit nga diabetes sulod sa dugay- dugay na nga panahon.