Polis napusilan, nakabalos

Patay ang usa ka armadong lalaki samtang naangol sa usa ka polis sa Pari-an police station human sa shootout kagahapon sa kaadlawon diha sa dalan Sikatuna sa barangay Day-as ning dakbayan.

Ang namatay human mapusili sa dughan giilang si Christopher Reponte, 25, residente sa Univille, barangay Kasambagan ug lumad nga taga Surigao del Sur.

Si Reponte napusilan patay ni PO3 Erwin Ferrer, 38, sakop sa Pari-an police station ug residente sa barangay Talamban ning dakbayan kinsa naunhan og pusil ni Reponte ug naigo diha sa ibabaw’ng bahin sa tuong dughan. Si PO3 Ferrer naunhan og igo sa dughan, apan nakabalos hangtod namatay  si Reponte.

Matud pa sa imbestigasyon nila ni SPO1 Rogelio Nedamo ang mga polis sa miscellaneous team mitubag sa alarma kabahin sa tawong nagdala og armas nga giingong nanion sa mga traysikad drayber diha sa barangay Kamagayan.

Ang mga traysikad drayber maoy miduol sa mga polis inabagan sa mga tanod sa Day-as pagpangita sa suspek hangtod nga kini ilang nakit-ang nagbahas-bahas diha sa nahisgutang dapit.

Ang grupo ni Ferrer gilangkuban nila ni SPO2 Ricardo Escobedo, PO3 Arnel Vender, PO1 Elmer Degoro ug mga tanod luwan sa patrol car nga may plakang SEZ-930.

Apan dihang nikanaog si Ferrer ug mimando kaniya sa pagtahan gikatahong kalit nga gipalusot sa suspek ang armas diha sa iyang ilukan dayong kablit niini padulong sa mga polis.

Si PO3  Ferrer naigo diha sa dughan apan gikatahong daling nakabalos ug nakapusil usab sa suspek hinungdan sa hinanali usab niining kamatayon.

Si PO3 Ferrer daling gidala sa Velez Hospital ug gibalhin sa Chung Hua Hospital alang sa pag-atiman.

Narekober diha sa posesyon sa patay’ng lawas sa suspek ang usa ka .38 kalibreng rebolber nga gituohang paltik nga may tulo ka basiyo sa bala ug usa ka buhing bala.

Samtang gikuha usab sa kapolisan ang armas ni Ferrer nga usa ka Pietro Berreta 9 millimeter pistol alang sa eksaminasyon.