Manghod Gipatay sa Kuya

Patay ang usa ka 35 anyos nga lalaki human kini dunggaba sa iyang maguwang nga dugay nang nagdumot kaniya ug buot makabalos human ang suspek gidunggab niini.

Ang pagpatay nahitabo atol sa tigbakayan diha sa barangay Calape sa lungsod sa Daanbantayan niadtong Sabado diin ang biktima giilang si Arnaldo Dapat, 35, taga sitio Fatima sa barangay Bagay, Daanbantayan samtang ang biktima nagtan-aw sa tigbakay.

Sumala pang PO3 Dennis Velez sa Daanbantayan police sa pakighinabi sa Banat News nagkanayon nadakpan ra dayon ang suspek sa mirespondeng mga polis ug giilang si Andres,48.

Gikatahong nagdumtanay ang duha ilabi na ang suspek tungod kay kini nadunggaban sa biktima niadtong bulan sa Pebrero.

Matud pang Velez kasamtangang nagtan-aw og tigbakay si Arnaldo diha sa barangay Calape alang sa kapistahan sa maong dapit dihang nasigpatan sa suspek ug kalit nga gilipot sa luyo ug gidunggab ginamit ang usa ka 10 pulgadas nga kutsilyo hinungdan sa kamatayon niini.

Ang grupo ni SPO2 Carlo Condino nga maoy nakaresponde maoy nakadakop sa suspek ug gikatakdang pasakaan na kini og kasong parricide karong adlawa.