Kap mihimakak nanumbok kawatan

Hugtanong gihimakak sa kapitan sa barangay Bae lungsod sa Sibonga nga si Constancio “Conie” Padigos nga gitumbok niya ang pamilya sa gipatay nga biktima nga si Mario Carillo nga maoy responsable sa mga milabay’ng pipila ka pagpangawat og mga kahayopan sa ilang lugar.

Atol sa pagbisita ning tigbalita didto sa maong lugar nga nahimutang sa bukirang bahin 20 kilometros gikan sa lungsod personal nga gisaksihan sa Banat News ang panag-atubang ni  Padigos ug sa pamilyang Carillo atubangan sa hepe sa kapulisan nga si Sr. Insp. Noli Cernio.

Si  Padigos nipasabot sa kabanay sa biktima nga wala siya magtumbok sa pamilya niini nga maoy suspek sa mga milabay’ng pagpangawat sa pipila ka kahayopan sa ilang lugar.

Gipasabot ni  Padigos nga wala sila magka-estorya sa imbestigador nga si SPO1 Ramuel Banugon dihang nahitabu ang pagpamusil patay sa biktima.

Ang biktima nga si Mario Carillo girakrakan og M-16 Armalite rifle ug nakaangkon og tulo ka samad sa tiyan samtang nagsusi sa iyang mag-alanak nga baka sa baol niini, hinungdan sa iyang kamatayon.

Hinuon gipasalig sa hepe nga si Sr. Insp. Cernio ngadto sa pamilya sa biktima nga tabangan og asikaso aron masulbad ug matumbok ang responsable sa krimen human sa tapos sa biktima.

Si Sr. Insp. Cernio mitunol usab sa pamilya sa biktima og gamay’ng hinabang nga gipadala ni Sibonga Mayor Lionel Bacaltos.

Gitug-an hinuon ni Ekil Carillo, maguwang sa biktima ug tanod sa sikbit nga barangay sa Apo sakop sa lungsod sa Argao dihang nahinabi sa Banat News nga nasagmuyo siya sa migawas nga report nga nakahatag og dakong kauwawan sa ilang pamilya nga nakapasamot sa kaguol nga ilang gibati tungod sa kamatayon sa iyang igsuon.

Giklaro nila nga dili na sila interesado pa nga mopasaka og kaso sa mga suspek  ug ihangad na lang nila sa langit ang pagpangita sa hustisya.