Anak nga nanghagis gipapriso

Gipasakaan og kaso ug gipapriso sa ginikanan ang kaugalingon niining anak nga badlungon ug palahubog nga kanunay manghagis ug nisuway og sunog sa ilang balay sa barangay Manga, lungsod sa Alcantara niadtong Martes sa alas 8:00 sa buntag.

Ang gidakop sa kapulisan ug gipasakaan og kaso mao si Crisanto Sambilad Talledo, 22, ug molupyo sa nahisgutang lugar.

Samtang ang inahan niini nga niunay og pasaka og kaso kaniya giila nga si Efrenia Talledo, ingon man ang iyaan nga si Cerela Talledo.

Matod ni Insp. Ranulfo Lastimoso hepe sa Alcantara Police dihang nahinabi sa Banat News nangayo og P300 pesos ang suspek apan tungod kay gihatagan na kini og kwarta nianang pagkagabii wala na kini hatagi pa.

Kini maoy hinungdan nga nasuko ug gihagisan ang iyang inahan, gipangguba ang atop ug bungbong sa ilang balay ug dihang gibadlong sa iyaan gisulong na usab kini ug giapil og guba ang pinuy-anan niini.

Wala pa matagbaw ang suspek nikuha kini og mga dahong laya ug gitapok sa ilang balay dayon gidagkutan aron dauban ang balay niini.

Apan dali nga nisumbong sa kapulisan ang inahan sa suspek hinungdan sa pagkasikop niini.

Kasong grave threats ang gipasaka sa kapulisan batuk sa suspek kagahapong adlawa.