6 patay sa dengue sa Mandaue

Mokabat sa unom ka biktima sa dengue ang  namatay sa dakbayan sa Mandaue gikan sa bulan sa Enero karong tuiga nga naggikan usab sa lima ka barangay niini.

Si Mandaue City Health Office Dr.  Oscar Quirante dihang nahinabi sa Banat News miingon  nga ang pagpadayon sa pagpatuman sa kalimpiyo sa palibot sa kabalayan ug mga tulunghaan maoy bugtong paagi sa paglikay sa sakit nga dengue.

Sa nasayran sa Banat News nga sa unom nga namatay  sa sakit nga dengue  ang duha gikan sa barangay Tawason ug laing upat nga mga namatay usab sa dengue ang gikan sa Pagsabungan, Looc, Jagobiao ug Cabancalan.

Sa iyang gidaghanon nga gitakboyan og sakit nga dengue sa miaging tuig 2007 maoy nagpakita nga mikunhod na ang iyang gidaghanon sa mga biktima gikan sa 150 ngadto na sa 73 niining tuiga.

Nag-una nga mga barangay  kaniadto mao ang Mantuyong ug Banilad nga mikunhod na ang gidaghanon niining tuiga tungod usab sa padayon nga pagpatuman sa maong gimbuhaton.

Nunot sa tinguha nga paglikay sa sakit nga dengue nga gikan sa pinaakan sa mga lamok maoy gihingusgan sa buhatan sa panglawas ang pagpatuman sa kalimpiyo sa palibot.