Sison murder wa pa masulbad

Bisan sa pagkasikop ni Nemuel Camay Sumabong, ang Cebu City Police Office (CCPO) dili mohunong sa ilang kaugalingong imbestigasyon pagpangita og laing anggulo nga lahi sa anggulo nga gisubay sa National Bureau of Investigation (NBI-7) nga maoy nakasikop sa suspetsadong mibanhig-patay kang Atty. Richard William “Dick” Sison niadtong Mayo 21.

Samtang si Mayor Arturo Radaza sa dakbayan sa Lapulapu miawhag sa NBI-7 ug kapolisan sa pagpangita sa mastermind nga nagpapatay ni Sison aron makab-ot ang hustisya sa namatay’ng abogado ug sa pamilya niini.

Si Cebu City Police Director Patrocinio Comendador miasoy sa mga tigbalita nga magpadayon ang pakisusi sa Task Force Sison sa CCPO kalabot sa pagpamanhig sa abogado.

Niini, matud niya nga dili sirhan ang imbestigasyon bisan pa man sa report nga positibong giila sa mga testigos si Sumabong nga maoy mibanhig kang Sison samtang luwan sa iyang Toyota Hilux sa dalan V. Sotto ning dakbayan.

Giklaro hinuon ni Comendador nga ilang suportahan ang imbestigasyon sa NBI-7, apan ipadayon nila ang pagpangita og laing anggulo sa kamatayon ni Sison pinaagi sa pagsubay sa background ni Sumabong.

Si Sumabong, 30, lumad nga taga Banban, dakbayan sa Bogo, Cebu, ig-agaw ni Joel Sumabong, suspetsadong lider sa robbery group nga misakiyo sa P9.4 milyones nga kita sa Land Bank of the Philippines-Bogo. Nasikop kini atol sa gipahigayong ronda sa NBI-7 pinanguluhan ni special agent Renan Oliva sa usa ka balay sa barangay Camputhaw, ning dakbayan.

Matud pa ni Comendador nga pareho sila og mga testigos nga gihuptan sa NBI-7, apan lahi ang anggulo nga ilang gisubay.

Hinuon, human masikop si Sumabong, gimandoan gilayon niya ang Homicide Section sa pakigkooperar sa NBI-7.

Giangkon ni Comendador nga naglisud siya sa pagpangita og dugang ebidensiya gumikan kay ang pamilya ni Sison niadto lang miaging semana niya na-estorya ug gamay lamang impormasyon ang nakuha niya.

Ang kauban nga mga abogado ni Sison niadto pa usab miaging adlaw niya na-estorya. Si Comendador  miingon nga upat ngadto sa lima ka mga dagkong kaso ang gisubay sa Task Force Sison tungod sa pagtuo nga adunay dakong kalambigitan ang propesyon ni Sison pagka-abogado sa iyang kamatayon.

Matud pa niya nga adunay mga kasong naglambigit sa yuta, ilegal nga drugas, sexual abuse, ug uban pa nga ang nalambigit niining partidos sa kaso mga dagkong opisyal apan dili mga taga Sugbo.

Tungod sa pagkasikop ni Sumabong, si Mayor Radaza nga kliyente ni Sison, mipadayag og dakong kalipay.

“I am very happy with the most recent development, that is, the arrest of a certain Nemuel Camay Sumabong, alleged suspect in the brutal murder of Atty. Richard W. Sison,” si Radaza nagkanayon sa iyang pamahayag nga nadawat sa Banat News pinaagi sa text message.

“I sincerely appreciate the efforts of the NBI and other law enforcement agencies in trying to solve the murder and give justice to the victims and his family,” si Radaza nagkanayon.

Apan matud ni Radaza nga kinahanglang dili mohunong ang NBI ug ubang ahensiya nga nag-imbestigar sa kamatayon sa iyang abogado aron ilhon ang mastermind o mga tawo nga nagpaluyo sa pagpapatay niini.

“But this should not end here. The mastermind or those behind the murder should be unmasked. And to this goal, I encourage the NBI and other agencies to work harder and put the perpetrators behind bars where they belong,” sumala pa sa mayor.

Si Lapulapu city administrator Teodulo Ybañez miasoy hinuon sa Banat News nga masaligon sila nga hingpit masulbad sa NBI-7 ang kaso.