LPG miulbo

Naukay ang mga residente sa dalan A. Gabuya sa Poblacion, Pardo kagahapon sa alas 12:15 sa udto human mibuto ang usa ka LPG tank sulod sa usa ka apartment sa maong lugar.

Si SPO4 Edgar Abangan, desk officer sa Pardo Police Station miasoy sa Banat News nga usa ka sipa nga boto ang nabati sa mga residente sa maong lugar hinungdan sa kagubot ug panaghuot sa trapiko.

Sa spot report ni PO3 Richard Tagadi-ad nga daling miresponde sa maong hitabo, ang LPG miulbo sulod sa Door 2 sa Cardenas Apartment nga gi-okupahan ni Carlota Garcia.

Matud sa report ni PO3 Tagadi-ad nga ang LPG gitangtangan og hose hinungdan nga midakop kini sa kalayo gikan sa nagsugba sa luyo nga bahin sa gipuy-an ni Garcia.

Usa ka magtutudlo nga si Alvin Cresincio nga nag-okupar sa Door 1 nakaangkon og paso sa bukobuko, samtang adunay laing naangol nga wala mailhi sa mga awtoridad.

Nabungkag ang kinatibuk-ang Door 1, 2, 3 ug 4 sa apartment nga gipanag-iya sa usa ka Teodoro Cardenas. Ang Door 4 gi-okupahan sa Angels Wheels Purified Drinking Water.

Si SFO1 Oiretuale Baguio sa Cebu City Fire Department mitug-an sa Banat News nga nakapadala sila og firetruck sa maong lugar, apan wala na sila makapasirit gumikan kay walay kalayo atol sa ilang pag-abot.

Ang imbestigador sa kabomberohan pinanguluhan ni FO3 Antonio Gonzales padayon pa sa pagsuhid sa danyos nga gibilin sa maong aksidente.