Gigukod og armado patay sa high blood

Giatake sa high blood ug namatay ang usa ka 51-anyos nga lalaki paghiabot niini sa ilang pinuy-anan human kini gibati og kahadlok ug gikutasan sa pagdagan sa dihang gigukod sa usa ka armadong lalaki didto sa Sitio Bagsije, barangay Ocaña, siyudad sa Carcar niadtong Domingo sa alas 11:50 sa udto.

Ang biktima giila sa kapolisan nga si Hernando Labra Sr., minyo ug molupyo sa nahisgutang lugar.

Samtang ang gitumbok nga armadong lalaki nga nagdala sa wala matino nga armas nga migukod ug giingong buot mopusil sa biktima giila nga si Valentin Ursabia Jr., hingkod ang panuigon nagpuyo ra usab sa maong dapit.

Matud ni SPO1 Norman Lapeña sa Carcar City Police Station  subay sa blotter niini nga gikan nga misuroy ang biktima apan paghiabot niini sa maong lugar gigukod kini sa maong armado nga si Ursabia.

Tungod sa kahadlok sa biktima nga mapusilan, kusog kaayo kining midagan paingon sa ilang balay ug paghiabot niini mideretso kini sa taas og dayun gisirad-an ang pultahan ug bintana niini.

Paglabay sa pipila ka mga gutlo mao na lay nahibaw-an nga nangayo na og panabang ang mga anak niini sa mga silingan ug didto nahibaw-an nga giatake sa high blood ang biktima.

Gidali unta nila kini pagdala sa Carcar City Emergency Hospital apan gideklarar sa mga doktor nga dead on arrival (DOA).

Pagkakaron padayon pang nanghipos og mga ebidensya ang kapolisan aron maoy basehan sa pagpasaka og kaso batok ni Ursabia nga maoy gipasanginlan nga nakaingon sa kamatayon sa biktima nga giatake lang sa high blood.