Mga traysikol apektado’s rerouting padaganon og balik

Mga  traysikol drayber   nga naapektohan sa rerouting sa  barangay Labogon, Paknaan, Umapad ug Opao sa dakbayan sa Mandaue  hatagan og kahigayonan nga makabalik sila sa pag-agi sa dalan Sotero Cabahug,   barangay Ibabao.

Kini ang giamendar nga ordinansa nga gituki sa konseho sa dakbayan nga pangamahanan ni Konsehal Emiliano Rosal, chairman sa committee on transportation, communication utilities sa konseho sa dakbayan.

Ang maong giamendar nga ordinansa nga nakalabang na sa unang pagbasa sa regular session   sa miaging semana  nagtugot sa mga traysikol sa ilang pagbiyahe sa pag-agi gikan Labogon, Paknaan, Umapad ug Opao sa pagsubay sa dalan Gerardo Ouano.

Sa ilang paghidangat sa eskina dalan Sotero Cabahug sa Ibabao adto kini moliko sa tuo alang sa pagsubay niini ug moliko sa wala sa   eskina U.M. Seno ug molahos sa dalan P. Burgos sa Alang-Alang ug moliko sa luyo sa City Hall alang sa paglahos sa merkado publiko.

Sa ilang pagbalik mao gihapon nga dalan ang ilang pagasubayon sanglit ang higpit nga gidili mao ang  paglahos sa Ibabao, Estancia sa paglahos sa Supermetro Gaisano.