Batan-on gidunggab patay sa higalang ex-convict

Gidunggab patay sa usa ka ex-convict ang usa ka batan-ong lalaki nga iya ra usab nga higala sa usa ka imnanan didto sa Sitio Baybayon 1, barangay Calero, lungsod sa Lilo-an, Cebu niadtong Biyernes sa alas 10 sa gabii.

Ang biktima nga nakaangkon og samad dinunggaban sa iyang walang bahin sa dughan giila nga si Diolan Pantoja Cagang, 18, ulitawo ug molupyo sa nahisgutang lugar.

Samtang ang gitumbok nga suspek nga usa ka ex-convict giila nga si Glenn Arranguez Licay, 26, kasamtangang nagpuyo sa maong lugar apan lumad nga taga Tomas Opus, Southern Leyte.

Matud ni SPO1 Claudio Castro Jr., subay sa blotter niining gibasehan nag-inom ang biktima ug ang suspek sa managlahi nga lamesa ug pulos dunay lain- lain nga kauban sa wala pa ang hitabo.

Matod ni SPO1 Castro managkaila ang suspek ug ang biktima hinungdan nga sa tanto nilang panag-inom milipot ang suspek sa luyo nga bahin sa biktima ug gigakus-gakus ug gituok niini ang biktima.

Nagkagubot ang mga tawo nga nag-inom sa maong lugar ug nagkatibuwaag kini sa pagpanagan dungan usab ang pagsibat pahilayo sa suspek nga hangtod karon padayon pa’ng gipangita sa kapolisan.

Samtang ang biktima gidali unta pagdala sa Eversely Hospital sa siyudad sa Mandaue apan gideklarar kini sa mga doktor nga Dead on Arrival (DOA).