Bigtime ‘pusher’ sa Talisay nadakpan

Nadakpan sa Talisay police ang usa ka giingong big time drug pusher ug kauban sa gipahigayong pagpangronda sa mga sakop sa Provincial Anti-Illegal Drugs Special Operation Task Group (PAIDSOTG) kagahapon sa buntag sa sitio Hawod, barangay Poblacion, dakbayan sa Talisay.

Ang suspetsado mao si Mikeson Boisen ug Arnel Catubay pulos mga residente sa nahisgutang lugar.

Nasakmit gikan nila ang usa ka medium nga pakete, tulo ka longitudinal nga pakete, 18 ka gagmay’ng pakete nga pulos dunay sulod nga gituuhang shabu.

Nakuha usab ang usa ka digital weighing scale, salapi nga P1,400 nga gituohang halin sa ginadaling drugas, 12-gauge shotgun nga dunay buhing bala ug usa ka unit nga security camera.

Si Boisen ang giingong mohalin og 15-20 gramos nga shabu matag adlaw.

Ang grupo ni Superintendent Erson Digal ug mga sakop armado sa search warrant nga giluwatan ni Regional Trial Court Judge Eric Menchavez sa Branch 21 batok kang Boisen.

Si Catubay kinsa naila nang drug pusher diha sa lugar  naaktuhan sa diha sulod sa balay ni Boisen ug nakuhaan usab og napulo ka paketeng shabu.