Nabulit og mga samad tinigbasan ug dinunggaban ang usa ka lalaki nga patay nang nakit-ang nagbuy-od sa dalan barangay Bulak lungsod sa Dalaguete niadtong Sabado sa alas 6:00 sa buntag.
Ang biktima giila nga si Juan Amandoron, walay klarung trabaho ug molupyo ra usab sa nahisgutang lugar.
Matud ni PO2 Cerilo Glipa sa Dalaguete police, ang biktima naka-angkon kini og daghang mga samad dinunggaban sa iyang dughan ug tulo sa tiyan.
Kini wala pay labot sa tinigbasan sa abaga, bukobuko ug bukton nga gituuhang agi sa pagpanalipod niini sa iyang kaugalingon.
Matud ni PO2 Glipa gikan nitambong og birthday party sa usa ka Samuel Quiroga ang biktima nianang pagkagabii apan sayo sa buntag niadtong Sabado nakit-an nalang kini nga nagbuy-od na nga wala nay kinabuhi sa karsada.
Gituohan sa kapulisan nga posibleng giatngan ang biktima sa dalan ug gipatay sa wala pa mailhing mamumuno apan gituuhang posibleng kaaway kini sa gipatay.