Di paghatag og diskuwento sa pletihan iligal

Giawhag sa buhatan sa Land Transportation Office (LTO) 7 ang mga sumasakay pagreklamo batok niadtong mga drayber magdumili paghatag og diskuwento sa plete sa mga tinun-an ug senior citizens.

Si LTO-7 Regional Director Raul Aguilus nga nahinabi sa Banat News nagkanayon nga daghan sa mga drayber ang magdumili sa pagtuman sa 20 porsiyento nga diskuwento.

Gipasabot ni Aguilus nga kalapasan kini sa balaod ug kung di moreklamo ang mga naagrabyado niin magpadayon pa ang kahiwian sa mga drayber.

Dugang awhag nga ipasumbong mao ang cutting trips sa mga sakyanan maong mapugos ang mga pasahero sa pagsakay og laing sakyanan aron makaabot sa ilang destinasyon.

Sagad kini buhaton sa mga drayber basta kusog ang sakay sa siyudad ug duna say ubang drayber nga di na gyud molahos sa syudad ug anha nalang mopaabot og pasahero sa usa ka dapit nga daw nag-terminal.

 “Ang cutting trip sa mga drayber usa ka kalapasan sa balaod nga nagkinahanglan nga ireklamo sa mga pasahero aron kapahamtangan og silot,” ni Aguilus pa sa iyang pamahayag.