Inugurasyon  sa  UV lab. malampuson

Malamposon ang gipahigayong inugurasyon niadtong Biyernes sa hapon sa Hotel and Restaurant Management (HRM) Laboratory sa University of the Visayas niining dakbayan sa Sugbo.

Ang maong laboratory nga nahimutang sa 3rd floor sa Don Vicente Gullas Building sa UV Main Campus , naglangkob sa function room, banquet hall, kitchen nga dunay   first class nga mga ekipo nga gikan sa Italy ug Germany, executive suite ug  standard room, restaurant, cruise cabin, lobby ug house keeping department.

Ang maong laboratory matawag nga “bongga” tungod kay sama kini sa usa ka first class nga hotel.

Si Korina Sanchez kinsa usa sa news personality sa ABS-CBN maoy usa sa pinasidunggang dinapit sa maong inugurasyon diin siya maoy miputol sa laso nga giayudahan nila ni First District Representative Eduardo Gullas ug kanhi Kongresista Jose “Dodong” Gullas.

Si Joselito “Gigi” Gullas, Assistant Vice President for Finance and Administration mibutyag nga mikabat sa P13 milyones ang nagasto sa pagpaanindot sa maong laboratory ug gawas niini migasto usab sila og laing P5 milyones alang sa Criminology Department diin upgraded na ang mga ekipo sa forensics, finger printing ug photography.

Matud niya nga bisan sa kalisod sa ekonomiya apan ilang gipaningkamotan nga mahatagan og katagbawan ang mga estudyante   aron mahimo kining competitive ngadto sa merkado sa kalibotan.

Gibutyag ni Gullas nga ubos lang kaayo ang tuition fee sa HRM diin P16,000- P18,000 lang matag-semister itandi sa ubang mga tunghaan ning dakbayan.

Si Monsignor Joselito Tajanlangit, kura paroko sa Santa Teresa de Avila sa barangay Poblacion, dakbayan sa Talisay ang mipahigayon sa inugurasyon.