Lola nga nadunggaban sa apo namatay

Nakabsan sa kinabuhi ang usa sa duha ka mga tiguwang nga gidunggab sa ilang kaugalingong apo nga giingong nagumon na sa iligal nga drugas samtang ang mga biktima naa sa tambalanan.

Sumala pang Sr. Insp. Mario Monilar base sa gibutyag kanila sa mga kabanay nakabsan sa kinabuhi si Gaudiosa Labrador, 60, kinsa nakaangkon og usa ka samad dinunggaban diha sa tuong bahin sa likod duol sa hawak.

Si Gaudiosa namilo sa mga sinina niadtong tungura dihang kalit nga giduslak sa apo nga si Andrel Chan, 21, nga gikatahong nagumon na sa iligal nga drugas ilabi na sa marijuana.

Gawas kang Labrador nadunggaban usab si Sally Chan,nga apuhan usab sa suspek dihang nasugatan niini ang naulahi diha sa hagdanan pagkadungog sa singgit ni Labrador nga nagpakitabang.

Nasuta nga si Chan gikatahong natulog niadtong Huwebes sa udto ug kalit lang giambakan sa iring, sa kakurat niini naalimungawan ang suspek ug milanit og unom ka pulgadas nga kutsilyo dayong gihansakan si Gaudiosa.

Matud pang Monilar kasong parricide ug frustrated murder ang isang-at nila batok kang Chan ugmang adlawa.