Pag-umangkon sa mayor nagbinastos

Kasong acts of lasciviousness ug slight physical injury ang gipasaka kahagapong adlawa diha sa Provincial Prosecutors Office sa duha ka mga babaye batok sa pag-umangkon ni Mayor Deogenes “Wargong” Derama ug manghod ni Bise Mayor Merlou Derama diha sa lungsod sa Boljoon.

Si Rodolfo “Junjun” Derama  pag-umangkon ug staff ni Provincial Board Member Teresita “Daday” Celis,   gipasakaan og kaso tungod sa pagpamun-og ug pagbinastos niadtong alas 3 pasado sa kaadlawon niadtong Mayo 11, ning tuiga didto sa Sitio Estaca, barangay Poblacion, lungsod sa Boljoon.

Ang nagpakitabang sa buhatan sa Provincial Women’s Commission ingon man sa LAW-Inc. mao sila si Charmalou Lao, 29, taga Tupas, barangay Sawang Calero ning dakbayan ug Gemma Mendez, 35, residente sa Poblacion sa nahisgutang lungsod.

Sila si Lao ug Mendez miduso sa ilang reklamo kagahapon sa hapon pinaagi sa pag-abag ni Atty. Alfred Oquis sa LAW-Inc.

Si Lao mitug-an sa mga tigbalita nga human sa disko sa pista sa maong lugar naglingkod siya diha sa bangko  uban sa mga higala gawas sa panimalay ni Mendez kinsa maoy ilang gisak-an sa pagpamista.

Dihang kalit lang miabot si Junjun Derama sa iyang luyo ug mipadayag ngadto kaniya nga “half half lang” matud pa ang “b____” alang sa pagpakighilawas.

Hinungdan nga misangko sa ilang panagkonprontase sa dihang iyang gikasab-an ug iyang giingnan nga “unsay pagtuo nimo nako” nga gikasuko kaayo ni Derama. Wala pa makuntinto gidukol usab siya niini ug iyang gibawsan sa pagpatid.

Samtang si Mendez nagkanayon nga gipukaw siya ni Marcelino “Marlon” Patatag nga  daling migawas sa ilang panimalay gisusi niya ang kagubot sa gawas ug namadlong sa mga tawo didto nga dili magsaba-saba. Matud niini  “kamo pay mamisita kamo pay magsabasaba.”

Apan na surpresa  siya gumikan kay kalit lang siyang gisugat ni Derama ug gukumot sa kusog ang iyang tuong bahin sa ibabaw nga suso hinungdan nga nagpakurasyon siya ug hangtod karon nagsakit pa kini.

Gani niadtong higayona mibunot unta si Derama sa iyang dalang pistola kay buot unta silang pamusilon niini apan gipugngan sa ubang mga tawo nga didto sa gawas nga bahin sa ilang panimalay.

“Pamusilon gyud unta mi niya atong higayona kay sumala pa ni Marlon mibunot  sa armas may na lang kay napugngan nga wala gyud makasulod bisan kun trespassing na ang gihimo, sumala pa ni Mendez.

Samtang ang kauban  ni Derama nga si Sherwin Sesante miduol usab ug mitukmod pinaagi sa pagdasok kaniya  sa pagpasulod ngadto sa ilang panimalay.

Ang duha pulos mipadayag nga dili nila isibog ang maong kaso gumikan kay dili nila madawat ang pagbinastos ug pagpanapat  ni Junjun Derama ngadto kanila.

Samtang gikompirmar  usab ni SPO4 Crispino Uraca sa Boljoon Police Station nga ang biktimang si Mendez nagpa-blotter kini sa insidente nga “belated” niadtong Hunyo 2 ning buwana.