Gatindog sa dalan gipusil sa nagmotor

Usa ka lalaki ang gipusil sa duha ka lalaking nagmotorsiklo samtang nagtindog kilid sa kalsada kagahapon sa buntag sa sitio Kauswagan barangay Basak, Pardo.

Ang nakaangkon og duha ka samad pinusilan giila nga si Joebert “Amang” Sanico, 20-anyos nga molupyo sa sitio Tabucanal barangay Pardo ning dakbayan.

Segun sa imbestigasyon sa Homicide Section, si Sanico nagbarog daplin sa dalan dihang usa ka   yellow nga motorsiklo ang mihunong lima ka metros ang gilay-on gikan sa nahimutangan ni Sanico.

Matud sa mga nakasaksi ang angkas niini maoy mikanaog ug mipusil kang Sanico nga naigo sa tuong tiil ug sa ikaduhang higayon sa tuong kilid ug ang bala milapos sa walang bahin sa iyang hawak.

Daling nakaeskapo ang duha ka armadong mga tawo human sa maong pagpamusil.

Ang mga personnel sa Homicide Section inabagan sa usa ka nursing instructor nga si Rennie Cañada ang midali pagdala kang Sanico sa tambalanan.

Narekober gikan sa crime scene ang lima ka kabhang sa bala sa wa pa matinong kalibre sa armas samtang nagpadayon pa ang gihimong imbestigasyon ang biktima  gikatahong napriso na kaniadto tungod sa kasong robbery.