Nadugta sud sa watertank

Usa ka nadugtang patay’ng lawas sa babayeng katabang ang napalgan diha sulod sa usa ka kongkretong tangke sa tubig sa rooftop sa ikaupat nga andana sa usa ka building sa dalan Llorente sa barangay Capitol Site kagahapon sa buntag.

Naugkat human sa pipila ka oras sa mga sakop sa Bureau of Fire Protection retrieval team pinanguluhan ni SFO4 Bernardo del Mar ang patay’ng lawas nga  iya ni Justina Quevedo, 27, lumad nga taga barangay Naljub sa lungsod sa Dalaguete.

Sumala pang PO1 Michael Codaste sa Homicide Section sa pakighinabi sa Banat News nga niadto pang Lunes gipangita si Quevedo sa iyang agalon nga si Ester Ong ug mga kaubanang katabang.

Si Ricky Dimol, 17, kaubang katabang ni Quevedo nga usa sa nangita nagkanayon nga naabot siya sa ibabaw sa rooftop pagpangita ug nagduda dihang nakit-ang nawalis ang takob sa water tank.

Ang maong watertank gipanag-iya ni Virginia Yap nga maoy tag-iya sa edipisyo tupad sa building usab nga gipanag-iya sa agalon ni Quevedo.

Dihang iyang gilili di na masingha ang baho ug iyang nakit-an ang patay’ng lawas sa biktima   nga nagkulob sa sulod sa maong tangke sa tubig nga may taga hawak nga tubig apan may gilawmong napulo ka tiil ug nahimutang sa rooftop.

Wala pay nakitang foul play ang kapolisan diha sa lawas niini gawas lang nga niburot na kini ug nanimaho na apan si Codaste nagkanayon nga ilang irekomendar nga ipa-awtopsiya ang patay’ng lawas niini aron matino kung unsay gikamatyan sa babaye.

Si Brian Salvo, gwardiya sa usa ka restaurant diha sa tupad nga building nga gipanag-iya sa agalon ni Quevedo nitug-an sa mga tigbalita nga niadto pa sila sa adlaw’ng Lunes nangita niini.

Matud niya nagdali nga nilabay diha sa iyang pwesto si Quevedo ug dihang iyang gisitar igo rang nitubag nga nagdali kini kay gisugo sa ilang agalon.

Mao na kadto ang ulahing higayon nga nakit-ang buhi si Quevedo, ang iyang manghod nga si Rogelio nga nagtrabaho sa Mandaue City nitug-an sa kapolisan nga pipila ka adlaw una pa mawala si Quevedo nanamilit kini kaniya nga siya na maoy paatimanon sa ilang mga ginikanan kay gikapoy na kini sa pagpanarbaho.

Si Rogelio mi-blotter niini sa Fuente Police Station nga missing dihang wala na nila igkita.