Kolektor gisaka sa balay, gitulis

Mokabat sa 9 mil ka pesos ang nakuha sa duha ka mga tulisan nga nagtaptap sa ilang mga nawong ug nagsuot og helmet nga misaka ug mitulis sa kolektor  sulod sa ilang balay diha sa lungsod sa Cordova sa milabay’ng hapon.

Ang biktima mao si Luzviminda Degamo, 53, residente sa sitio Intramuros, barangay Poblacion lungsod sa Cordova diin maoy gitahasan sa pagkolekta sa iyang mga miyembro nga adunay mga utang sa usa ka lending firm.

Sa pasiunang imbestigasyon ni SPO1 Ebeneser Cadeliña sa Cordova Police station nasayran nga nag-ihap ang biktima sa nakolektang kwarta niadtong tungura dihang gisaka sa duha ka tulisan ug gitiunan og armas dayon gitulis.

Gumikan sa kakuyaw gihatag sa biktima ang kwarta ngadto sa mga tulisan kinsa dali usab nanakay sa ilang motorsiklo ug miikyas padulong sa dakbayan sa Lapulapu.

Samtang sa dugang imbestigasyon matud pa ni SPO1 Cadeliña susihon sa kapolisan sa Cordova kung wala ba kiniy kalambigitan sa “inside job” ang maong pagpanulis gumikan kay nasayod ang tulisan nga sa maong oras mag-ihap sa kwarta si Degamo.