Andam mobayad ang kagamhanan sa dakbayan sa Sugbu sa utang niini ngadto sa pamilyang Palicte labot sa gi-expropriate sa siyudad nga luna.
Kini human usab mopadala ang sheriff sa korte og “final demand” sa City Government pagbayad sa kulang niini ngadto sa nahisgutang pamilya.
Ang 5,295 ka metro kwadradong Palicte lot diha sa barangay Capitol site gi-expropriate sa siyudad niadtong tuig 2001 alang sa on-site development project sa mga kabus sa dakbayan.
Apan ang pamilyang Palicte mikiha sa siyudad tungod sa kapakyas niini pagtiwas og bayad human makadata og kapin sa P700 mil niadtong tuig 2002.
Tuod man nidaog ang pamilyang Palicte ug gikuha sa korte ang dul-an sa P9 milyones sa bank account sa dakbayan.
Kadto na maoy katapusang nahatag sa siyudad ngadto sa pamilyang Palicte, hinungdan nga naningil na usab kini sa siyudad.
Ang court sheriff niduso na sa final demand niadtong buwan sa Marso ngadto sa City Government apan hangtud niining higayuna kini wala gihapon mobayad.
Moabot na sa P20.3 milyones ang bayranan karon sa dakbayan lakip na ang interest niini nga mokapin usab sa P6 milyones.
Gipadayag hinoon ni City Administrator Bimbo Fernandez nga anaa sa final stage ang ilang pagpakigsabot-sabot tali sa pamilyang Palicte.
Miingon si Fernandez nga ang gustong bayran sa siyudad mao lang ang kulang niini nga P14 milyones ug pasagdan na lang ang interest.
“Anaa na ta sa final stage sa atong negotiation, ang atong gusto nga i-waive na lang ang interest and then we pay the P14 million in full right away,” sumala ni Fernandez.
Nagtoo hinoon si Fernandez nga mosugot ang pamilyang Palicte sa ilang tanyag kung kini gusto nga makuha na ang bayad gikan sa siyudad.
“Kay kung dili sila mosugot unya mo-file sila og garnishment case and then ato nang i-fight sa korte mosamot kalangay ang atong pagbayad,” dugang pasabot ni Fernandez.