Nasikop ang tulo ka mga sakop sa Barangay Intelligence Network (BIN) diha sa sitio Mansanitas, Cogon-Pardo kagahapon sa kaadlawon human sila giingong nanghasi ug nanion og armas sa mga kawani sa usa ka videokihan.
Giila ang tulo mao sila si Emideo Micalbo, Mario dela Cruz, Romulo Jugan nga giingong gikan pa nag-check point sa nahisgutang lugar ug nanghapit sa videokihan.
Apan sa ilang kahubog usa ka Bryan Adlawan nga kustomer gikatahong ilang gitiunan og armas. Hinungdan nga ang tag-iya sa videokihan nga si Jojo Crisostomo misumbong sa mga polis.
Ang tulo kusganong mihimakak sa pasangil nga nanion sila og armas sa usa sa mga kustomer.
Ang tulo gidakop sa mga sakop sa Pardo Police station ug gitanggong sa ilang karsel, apan si Chief Inspector Aureo Sanchez, hepe sa Pardo police station mitug-an nga naluoy ang tag-iya ug nakadesider nga di na sila pasakaan og kaso.