Giunay og lugos sa usa ka lalaki ang iyang minyo nga maguwang babaye diha sa kalibunan sa usa ka barangay sa siyudad sa Carcar niadtong Martes sa alas 7:00 sa buntag.
Ang 40 anyos nga biktima mitumbok sa iyang 24-anyos nga manghod nga lalaki nga miipon og puyo sa ilang panimalay diha sa maong dapit.
Matud ni SPO3 Ruben Renes, imbestigador sa Carcar City Police dihang nahinabi sa Banat News nanguha og kompay ang biktima uban sa suspek aron ipakaon sa ilang mga binuhi nga hayop nianang sayo sa buntag.
Apan samtang diha sila sa kalibunan gidiretso og layog sa suspek ang biktima, nisuway unta og sukol ang biktima apan gilupig kini sa kusog hangtud nga nakuha gyud ang iyang pagkababaye.
Human sa hitabu nisibat ang suspek ug gibiyaan ang ginang hinungdan nga nakahigayon ang naulahi pag-ilis ug misumbong sa kapolisan.Matud ni SPO3 Renes paingon na untang mo-eskapo ang suspek apan na-abtan kini sa mirespondeng sila si PO1 Ruby Molo diha na sa sitio Pit-os sa barangay Lantawan bukirang bahin sa lungsod sa San Fernando nianang pagka ala 1:00 na sa hapon sa susamang adlaw.
Kagahapong adlawa gikuhaan og affidavit sa mga pulis ang biktima alang sa pagpasaka og kaso batok sa suspek human usab kini gipaubos sa eksaminasyon sa mga doktor sa Don Vicente Sotto Memorial Medical Center (DVSMMC) ug nakumpirmar nga nalugos gyud kini.