NPA “leader” mipiyansa

Pormal nang gi-turn over kagahapon sa hapon sa Central Command ngadto sa Cebu Provincial Detention and Rehabilitation Center (CPDRC) ang gipasanginlang opisyal sa New Peoples Army nga si Ricardo Belamia human nakabayad sa piyansa nga P200,000 alang sa temporaryong kagawasan sa kasong rebelyon nga giatubang niini.

Ang release order ni Judge Sylva Paderanga sa RTC Branch 25 sa Danao gipitsahan niadtong Abril 30, 2008 nga nagmandung pabuhian na si Belamia.

Kahinumduman si Belamia nadakpan sa hiniusang pwersa sa PNP ug sa CentCom niadtong Nobiyembre 2, 2007 diha sa ilang pinuy-anan sa barangay Casay lungsod sa Dalaguete pinasikad sa arrest warrant nga giluwatan ni RTC Branch 25 Judge Sylva Paderanga sa Danao City.

Si Belamia gipasanginlang deputy secretary sa Cebu Island Committee sa NPA nga nagbase diha sa habagatang bahin sa lalawigan sa Sugbu.

Gilambigit usab siya sa tulo ka mga engkwentro ug sa duha  ka pagpang-ambush tali  sa mga sakop sa 78IB nga miresulta sa pagkamatay sa 12 ka mga sundawo diha sa Carmen ug Tuburan niadtong Disyembre 12, 2002 ug Oktobre 24, 2005.

“Allegedly, Belamia was involved during  encounters with the 78IB that’s why we are filling cases, the court will determine if he really is involve. This is temporary liberty of Belamia he will appear in court,” matud pang Major Christopher Tampus ang bag-ong tigpamaba sa Centcom.

Giklaro ni Tampus ang kaso ni Belamia wala untay gitugot nga piyansa apan na-downgraded kini gikan sa murder ngadto na sa rebellion.

Matud ni Tampus ang CPDRC maoy dunay katungod sa pag-release kang Belamia ug dili ang Centcom.