Ubol-ubol nabuak sa bala

Nabuak ang ubol-ubol sa usa ka batan-ong lalaki sa dihang gipareglahan kini ug gidul-itan og pusil sa iyang tangkugo nga milapos sa ubol- ubol samtang paingon na unta kining mopauli gikan nga mitambong og disko didto sa barangay Lutac, siyudad sa Naga, niadtong Lunes sa alas 3:10 sa kaadlawon.

Ang biktima nga nalandig pa  sa South General Hospital sa maong siyudad giila nga si Eleuterio Omandac, 23, ulitawo, ug molupyo ra usab sa nahisgutang lugar.

Samtang ang gitumbok nga suspek nailhan sa kapolisan subay sa pamahayag gikan sa mga saksi nga usa ka Teting Canoy, usa ka dayo ug kasamtangang nagpuyo sa maong lugar.

Matud ni PO2 James Cañete sa Naga City Police Station sa  dihang nahinabi sa Banat News  nga migawas sa diskohan ang biktima aron paingon na untang mopauli apan giatangan na kining daan sa suspek sa usa ka waiting shed nga dunay sobra sa 50 metros ang gilay-on gikan sa diskohan.

“Sa ilang mga tabi-tabi didto nga kontra-kontra daan ning biktima ug suspek, sa liog man to ang samad unya milapos sa ubol-ubol ang bala,” dugang asoy ni PO2 Cañete.

Ang suspek daling misibat human sa hitabo samtang ang mga tawo na nga gikan sa diskohan mao nay mitabang sa biktima pagdala sa tambalanan.

Padayon pa ang imbestigasyon sa kapolisan pagsikop sa suspek ug pagtumbok sa motibo sa krimen.