Duha ka resulosyon ang giaprobahan sa mga sakop sa Association of Barangay Captains kon ABC sa dakbayan sa Lapulapu gumikan sa pag-ambush patay kang Atty. Richard William “Dick” Sison diha sa V. Sotto St. sa barangay Tinago sa dakbayan sa Sugbu sa milabay'ng buwan.
Matod pa ni Lapulapu City ABC President ug Pajo barangay captain Leo Mercado sa milabay'ng semana atol sa ilang regular session uban sa 30 ka mga kapitan sa barangay sa dakbayan sa Lapulapu nagkahiusa sa paglagda sa duha ka mga resolusyon nga nagkondenar sa pagpatay ni Sison.
Ang unang resolusyon nagpaabot sa ilang hugot nga pagkadismaya sa nahitabo ni Sison nga gihulagway nilang dako og natabang sa kagamhanang lokal sa dakbayan sa Lapulapu ilabina sa pagdumala sa Emergency Rescue Unit Foundation kun ERUF ug ingon man ang paggukod sa mga tax evaders sa dakbayan sa Lapulapu nga hangtod karon ang uban wala pa kabayad sa ilang buhis.
Gihulagway sa mga kapitan nga tinalawan ang pagpapatay kang Sison diin nahadlok kini sa kaso nga gilabanan niini dili lamang sa kaso ni Lapulapu City Mayor Arturo Radaza kundi lakip sa mga kasong gilabanan niini isip pribadong abogado.
Matud pa ni Mercado ang tanan nagkahiusa sa pagpangayo og hustisya sa kamatayon ni Sison ug miawhag sa kapolisan sa dakbayan sa Sugbu nga seryosohon ang ilang imbestigasyon gumikan kay hangtod karon wala pay natumbok nga responsable ug ang nagsugo sa pagpapatay ni Sison.
Samtang ang ikaduhang resolusyon sa ABC mao ang pagpaabot sa ilang simpatiya ngadto sa kabanay'ng Sison.