Gidunggab sa usa ka 50- anyos nga lalaki ang barangay tanod nga igo lang mibadlong ug nitambag kaniya nga mohunong na sa kanunay og pagpangawat sa mga manok igtatari.
Nahitabo kini didto sa Sitio Azugon, barangay Lombo, lungsod sa Malabuyoc niadtong milabay’ng gabii sa alas 11:50 ang takna.
Ang nanunggab giila sa kapolisan nga si Saturnino Iran, 50, minyo ug molupyo sa nahisgutang lugar samtang ang iyang gidunggab mao ang usa ka tanod sa maong lugar nga si Marlon Pausal, 26, ulitawo, ug nagpuyo sa Sitio Abugon sakop sa nahisgutang barangay.
Subay sa imbestigasyon sa kapolisan, ang biktima ug ang suspetsado nag-inom nianang pagka sayong gabii apan sa dihang nahubog na gibalik-balikan og tambag sa biktima ang suspek nga mohunong na sa kanunay niining pagpangawat sa mga manok igtatari sa ilang lugar.
Gimaymayan pa sa biktima ang suspek nga dakong kauwawan ang pagpangawat og mga manok igtatari.
Walay kasayuran ang biktima nga naghandom og kasuko ang suspek sa mao niyang mga tambag hinungdan nga sa pagkahuman nila og inom nag-una nga milakaw ang suspek.
Apan dihang mipauli na ang biktima kauban ang usa ka lalaki giatangan kini sa suspek sa ngitngit nga bahin ug sa dihang miagi na sa lugar gideretso kini og dunggab sa suspek ug naigo sa tiyan.
Matud pa giusban pa gyud unta kini og dunggab sa suspek apan maayo na lang kay nasagang sa biktima ug didto mitaop ang kutsilyo sa walang bahin sa bukton niini ug dayong sibat pahilayo ang suspek.
Ang biktima gidala sa ospital sa lungsod samtang ang suspetsado nasikop nila ni SPO1 Mario Paler ug PO2 Santiago Anticristo samtang paingong mosibat sakay sa bus.