Way bayad ang enrollment

Subling gitin-aw ni Dr. Carolino Mordeno, Regional director sa Department of Education nga libre ang enrollment sa elementarya sa tibuok rehiyon 7.

Giluwatan ni Mordeno ang maong katin-awan subay sa daghang reklamo sa mga ginikanan nga duna gihapoy mga magtutudlo nga mangolekta og bayranan atol sa pagpa-enroll sa ilang mga anak.

Matud ni Mordeno nga mahimong silotan ang mga magtutudlo nga mangolekta og bayad atol sa enrollment tungod kay may lagda na nga gipagawas ni Education Secretary Jesli Lapuz nga nagdili niini.

Uyon usab si Mordeno sa kamanduan ni Presidente Gloria Macapagal Arroyo nga dili na pasuoton og uniporme ang mga tinun-an sa grade one.

Kini aron makadaginot na unya ang mga ginikanan gumikan kay dili naman sila makapalit og uniporme alang sa ilang mga anak nga nagtungha sa grade one.

Giklaro sa director nga gumikan sa kamanduan ni Arroyo mahimo nang magsuot og tsinelas ang mga tinun-an sa grade one kung sila mosulod na sa ilang klase sugod karong Hunyo 10.

Samtang gibutyag ni Mordeno nga ilang ipadayon ang pagpanghatag og bugas humay sa mga tinun-an sa grade one ug kindergarten karong abli sa klase.

Suma pa niini nga magpadayon ang “Food for School” program para sa mga tinun-an sa grade one ug kindergarten nga nasugdan na sa pagpanghatag niadtong bulan sa Pebrero kini tungod kay kabahin na kini sa programa ni Arroyo.

Base sa maong programa matag adlaw hatagan og tag usa ka kilong NFA rice ang mga tinun-an sa grade one ug kindergarten.