John-John giawhag paatubangon sa kaso

Gihagit ni Atty. Clarence Paul Oaminal sa Philippine Drugs Enforcement Agency (PDEA-7) si Bise Gobernador John Gregory “John-John” Osmeña nga mopatim-aw na ug atubangon ang iyang kaso may kalimbigitan sa pagpalusot sa mga kemikal nga psuedo-ephidrene dinhi sa Sugbu pipila na ka tuig ang nakalabay.

Kini maoy gipadayag ni Oaminal sa dihang gikahinabi sa Banat News nga angayan unta nga tambagan sa mga abogado niini ang kanhi bise gobernador nga dili na motago ug atubangon ang kaso dinhi sa nasud.

Matud pa niini nga sa iyang tan-aw ang maong kaso dili angayang ikahadlok ni Osmeña gumikan kay gamay lang kaayo kini ug gani sa iyang paglantaw ang kanhi bise gobernador makabutang og P200 mil nga piyansa.

Gipadayag usab niini nga karong nahuptan na ni Regional Trial Court Judge Mendrado Paredes sa branch 13 ang mosyon sa kaso ni Osmeña nanghinaot siya nga mapadali na kini karon.

Gani nagtinguha usab siya sa paghangyo ni Department of Justice Undersecretary (DOJ) Ernesto Pineda nga kun matuki na usab unya sa DOJ ang maong kaso ilakip sa mga panel of prosecutors si Piskal Jose Nataniel Andal.

Samtang subay niini ang kapolisan usab sa nasud sa Australia mipasalig sa PDEA nga mokooperar usab sa maong kaso aron usab mapalig-on pa ang ilang ebidensya.

Nasayran nga ang DOJ naglaraw karon sa pagpa-extradite ni Osmeña balik dinhi sa nasud human usab kini karon nagtagotago didto sa Amerika gumikan sa kaso niini dinhi sa Sugbu nga giatubang labot sa mga kemikal sa ginadiling drugas diin gikatahong apil ang kanhi bise gobernador.