Lola nipilit sa railings pagbangga sa trak

Namatay ang usa ka 71-anyos nga babaye human kini mapiit sa railings daplin sa karsada dihang gidasmagan sa 10-wheeler nga Isuzu dumptruck sa barangay Palanas lungsod sa Alcantara niadtong Biyernes sa alas 6:45 sa buntag.

Ang biktima giila sa kapulisan nga si Iluminada Lumin Pulgo Abapo, 71,  molupyo sa nahisgutang lugar.

Samtang ang drayber sa 10-wheeler Isuzu dumptruck nga nakaligis kaniya giila nga si Ricardo Rabanes Cobong, 27, taga sitio Apid, barangay Lutopan siyudad sa Toledo. Matud ni PO1 Herbert Lamosao dihang nahinabi sa Banat News nagsunod ang maong Isuzu dumptruck ug sa Librando bus ug paghiabot sa maong lugar kalit lang mimenor ang maong bus aron mopakanaog og pasahero.

Nakalitan ug ulahi nang naka-brake si Cobong maong iya nalang kining gilihay ngadto sa walang bahin sa karsada aron pag-overtake apan milahos kini sa railings ug gipunggit ang biktima diha sa kilid niini.

Ang mga tawo na nga diha sa nahitabuan maoy  midala sa biktima sa Badian District Hospital apan gideklarar kini nga dead on arrival (DOA) tungod sa grabeng kadaut sa tibuok kalawasan niini.

Ang drayber  misuway unta pag eskapo apan na-corner sa mga pulis ug nadakpan.