Dengue sa Labangon kontrolado

Gipasigarbo karon ni Kapitan Felix Abella sa Labangon nga kontrolado na ang sakit nga dengue diha sa ilang barangay.

Gani niingon ang kapitan nga sukad sa miaging buwan, wala nay natala nga kaso sa dengue diha sa Labangon.
“Ang dengue sa Labangon is controlled already, zero na man mi sa dengue karon, gikan niadtong miaging Abril dengue-free na ang Labangon,” sumala sa kapitan.

Ang kanunay nga pagpanglimpyo sa mga molupyo ug ang pagyabo sa tanang napundong tubig, maoy gitumbok sa kapitan nga hinungdan sa maong kalambuan.

Kahinumduman nga sa miaging tuig, ang barangay Labangon mao ang nag-una sa labing daghan og kaso sa dengue sa 80 ka mga barangay sa dakbayan.

Gani gipabutangan ni Mayor Tomas Osmeña og pasidaan sama sa karatula nga “Dengue Zone” ang apektadong mga dapit diha sa nahisgutang barangay.

Gitataw hinuon ni Abella nga bisan og wala nay dengue ang Labangon, gipabilin gihapon nila ang mga dengue warning sign diha sa ilang dapit.