Nasikop kagahapon ang usa ka sakop sa Trihedron fraternity nga gitumbok nga mipatay sa usa ka sakop sa Akrho niadtong Hunyo 10, 2007.
Pinaagi sa usa ka warrant of arrest nga giluwatan ni RTC Branch 22 Judge Manuel Patalinghug, gidakop si Rolyne Villaver Alcantara, 20, minyo ug lumulupyo sa Tabunok, dakbayan sa Talisay.
Nagkanayon ang arresting officers nga sila si PO3 Arnold Damasco ug PO2 Erwin Carbonquillo nga hagbay ra nga nadakpan ang mga kauban niini ug siya nalay gipangita si Alcantara.
Gatrabaho si Alcantara sa Cabañero Bicycle Supply nga nahimutang sa Sangi, Tabunok, siyudad sa Talisay dihang ila kining giaresto.
Mihimakak si Alcantara nga siya mao ang gipangita ug misuway pa kini pag-eskapo.
Sa pakisusi sa Banat News nagkanayon si DSWD Officer Fe Bacaltos, inahan sa gipatay nga si Edward Gabriel dili tinuod nga katapusan na sa lista sa gipangita nga mipatay sa iyang anak si Alcantara.
Sanglit aduna pay duha nga padayon nga gipangita apan wala kini mobutyag sa mga pangalan niini.
Si Edward Gabriel gipusil sa buko-buko sa mga sakop sa Trihedron fraternity tungod sa panagribal sa ilang mga grupo.