Fiscal Castro mobalik na usab sa BID

Gidestino sa  buhatan sa Bureau of Immigration and Deportation (BID) sa Sugbo si Fiscal Mary Ann Castro sulod na sa pipila ka mga bulan ang nakalabay.

Kini ang gikompirmar ni BID Director Reynaldo Almadin nga nahinabi sa Banat News kagahapon.

Gitataw niya nga ang pagkadestino ni Fiscal Castro sa buhatan sa BID wala magpasabot nga usa na siya ka kawani sa maong buhatan sanglit gidestino lamang kini sa Department of Justice (DOJ) alang sa pag-imbestigar og mga kaso sa nahisgutang buhatan.

Si Almadin miingon nga sama kang Castro ang BID ubos usab sa buhatan sa (DOJ) kinsa maoy nagdestino niini isip imbestigador sa mga kasong administratiba.

“Detailed lang si Fiscal Mary Ann Castro sa BID,” ni Director Almadin pa nga namahayag dihang gikahinabi sa Banat News. “Ang DOJ maoy nag-detail  kang Fiscal Castro sa BID ug ang iyang tahas mao ang pag-imbestigar  sa mga administrative cases sa BID.”

Sa nasayran nga dihang migawas ang taho labot sa pagbalik ni  Castro sa BID giingong daghan usab ang gibatig kahingangha sanglit ang iyang pagbalik-balik sa maong buhatan sama sa nagpakita lamang sa kalig-on sa mga  opisyal nga nagpaluyo niini.