Tomas gikataw-an lang sa Capitol Lawyers

Gikataw-an na lang sa consultant sa kapitolyo nga si Atty. Rory Jon Sepulveda ang giluwatang pamahayag ni Mayor Tomas Osmeña. Ang mayor nihingalan og “b_go” sa mga abogado sa kagamhanang probinsyal human ibasura sa korte ang gisang-at niini nga petition for declaratory relief.

Kini may kalabutan usab sa pagtudlo ni Osmeña ug sakop sa MCWD board (Joel Mari Yu) nga gikwestyon ni Gobernador Gwendolyn Garcia.

Apan ang nahisgutang petisyon gibasura sa hukmanan tungod sa teknikalidad, butang nga gikalipay sa mayor dungan sa paghingalan og dili mao sa mga abogado sa kapitolyo.
Daw naanad na hinoon si Sepulveda sa dili maayong pamahayag sa mayor tungod kay siya giingong dili na masakitan niini.

“Kung si mayor Tom lang ang mosulti di man ko sakitan, we don’t mind him kay ‘makabu_ng’ na siya if you mind this guy,” sumala sa capitol consultant.

Matod ni Sepulveda nga masayran unya sa mosunod nga mga adlaw kung unsa ang ilang sunod nga lakang labot sa hukom sa korte.

Gitug-an sa capitol consultant nga silang mga abogado sa kapitolyo magtagbo pa kung unsay ilang himoon tungod kay giingong managlahi nilang opinyon.

Ang provincial attorney nga si Mariano Martinquilla giingong gusto nga mosang-at og mosyon sa desisyon sa hukmanan apan si Sepulveda dili pabor niini.

Kini tungod sa iyang pagtoo nga dili na manginlabot ug labaw nang dili na ganahan ang huwes sa isang-at unya nila nga mosyon.

Gitataw hinoon ni Sepulveda nga nagpabilin gihapon ang ilang pagtoo nga si Garcia maoy dunay katungod pagtudlo og sakop sa MCWD board.

Ang Presidential Decree 198 (Provincial Water Utilities Act) maoy gisandigan ug gibasehan sa capitol consultant niini.

“In that law ang consumer sa particular district that waill be less than 75% of a particular city, the appointing authority will be the governor,” matod ni Sepulveda.

Apan alang sa mayor, dili na kini mahimong gamiton nga depensa sa kapitolyo, tungod kay ang maong balaud namugna panahon sa Martial Law.

“That law was made during martial law when there was no democracy and they say we must follow that, in other words, ang 30% mahimo nang majority,” niingon si Osmeña.

Gawas niini, ang dakbayan giingon sa mayor nga ubos pa sa probinsya niadtong higayuna dihang napanday ang nahisgutang balaud.

“If the judge will go along with that, I think that will be the first case in history where the minority rules,” dugang pamahayag ni Osmeña.