Mag-agaw gi-ambush usa ang namatay

Usa ang patay ug usa ang naangol sa manag-agaw nga gibanhigan didto sa barangay Basak lungsod sa Sibonga niadtong Miyerkules sa alas 2:30 sa hapon.

Ang napatay giila sa kapulisan nga si Richard Padin, 22, usa ka habal habal drayber samtang naangol ang ig-agaw niini iya ra usab nga pasahero nga si Danilo Miñoza, 28, pulos molupyo sa sitio Catap barangay Banlot sakop sa maong lungsod.

Ang gitumbok nga suspek giila nga si Pablo Llanos Jr., molupyo sa sitio Gipon barangay Manatad.

Matod ni PO3 Antonio Sanchez sa Sibonga Police dihang nahinabi sa Banat News ang duha padulong sa barangay Basak aron motambong og fiesta tungod kay bisperas sa maong lugar niadtong higayuna.

Apan paghiabot nila sa mingaw nga lugar giatangan sila sa suspek ug duha ka mga wala mailhing kauban niini ug gidiretso sa pagpusil.

Si Padin nga maoy diha sa atubangan naigo sa tuong bukton dihang nisuway kinig  isa sa kamot apan nilapos sa walang dughan ang bala, naigo usab kini diha sa paa hinungdan sa iyang hinanali nga kamatayun.

Samtang si Miñoza naigo sab sa iyang lawas ug dali kining gidala sa tambalanan samtang ang mga suspek naglumbaanay sa pagsibat gikan sa nahitabuan.

Ang niresponde mga polis nakahipos sa crime scene og lima ka kabhang sa bala sa kalibre .45 ug usa ka slug niini.

Sumala pa sa naluwas nga si Miñoza nagdumot kaniya si Llanos ug napagan lang ang habal habal drayber.

Gani gitug-an ni PO3 Sanchez nga ang biktima nga si Miñoza badlungon usab kini sa ilang lugar ug nadakpan na kini sa paghupot og armas nga walay lisensya apan nakagawas human makakuha og probation.