Idlas nga suspek sa lugos nasakpan na

Nasikop sa kapolisan niadtong Lunes sa hapon didto sa barangay Lagunde, lungsod sa Oslob ang suspetsado sa pagpanglugos og usa ka menor de edad nga kulang sa pangisip nga iyaha ra usab nga silingan sa sitio Pahulayan, barangay Bugho lungsod sa Moal-boal niadtong tuig 2004.

Ang suspetsado giila nga si Elisio Asma Celestial, 32,  ulitawo, lumad nga molupyo sa lungsod sa Moalboal.

Si Celestial ang gidakop nila ni SPO1 Narciso Ysao, PO3 Eduardo Seno, PO3 Winston Peñaranda Jr. ug PO1 Alex Mendaros subay sa warrant of arrest sa kasong “two counts of rape” nga giluwatan ni Barili Branch 60 Regional Trial Court Judge Leopoldo Cañete.

Matud sa hepe sa Moalboal police station, Inspector Rully Lauron dihang nahinabi sa Banat News nga nakadawat sila og taho nga nisibat sa ilang lugar ug didto na magtago tago sa lungsod sa Oslob ang suspek human kini malutsi og warrant of arrest sa kaso niadtong tuig 2006.

Kini maoy hinungdan nga nakig-alayon sila sa kapolisan sa Oslob ug niresulta sa pagkasikop sa suspek.

Matud ni Inspector Lauron tulo na ka higayon nga nakadawat sila og impormasyon sa gitago-an ni Celestial apan kanunay kining maka-eskapo sa dihang molusad sila og operasyon.

Ang insidente sa pagpanglugos nahitabo niadto pang tuig 2004 kinsa ang usa ka 19-anyos na karon nga babaye nga giingong  dili maayo ang pangisip ug minor de edad pa kini niadtong higayona sulod sa duha ka higayong gikatahong gi-among-amongan sa suspetsado.

Ang suspek nagtingkagol na karon sa detention cell sa Oslob ug gitakda kining itugyan ngadto sa kapolisan sa lungsod sa Moalboal.