Ilegal nga panagat nadakpan

Tulo ka kahon nga isdang tulingan, usa ka pukot ug motor-bangka nga panagatan  gidakop ug gisakmit sa kapolisan human masakpi sa akto nga nagpahigayon og ilegal nga pagpangisda sa kadagatan sa Poblacion lungsod sa Oslob, Cebu niadtong milabay’ng buntag.

Ang gidakop nga panagatan mao ang usa ka motor-bangka nga dunay tatak nga Sto. Niño ug apil sa gidakop ang kapitan niini nga si Nicomedes Arasan, 34, minyo, taga Tagbilaran City, Bohol.

Apil sa nasikop ang lima ka mga fish workers niini nga sila si Henry Belotando, 31, minyo, taga Tabulong Dawis, Bohol, Eddie Somaylo, 40, minyo, molupyo sa susamang lugar, Paterno Samante, 47, minyo, taga Sungkolan, Dawis, Bohol, Marvin Bert Amilan, 22 ug Christopher Estamico, 21, minyo molupyo gihapon sa susamang lugar.

Ang kapolisan sa Oslob pinangulohan ni SPO1 Allan Teo Kintanar inabagan sa mga sakop sa Bantay Dagat sa maong lungsod maoy nakadiskita sa maong ilegal nga panagatan samtang nagpahigayon kini og patrolya sa kadagatan sa lungsod niadtong higayona.

Matud ni SPO1 Narciso Ysao sa Oslob police station dihang nahinabi kini sa Banat News gidala sa ilang buhatan ang mga dinakpan apil na ang mga nasakmit nga butang gikan sa ilang posesyon apan paglabay sa pipila ka oras gibuhian kini human makabayad og multa nga P9,000.00 ngadto sa Treasurer’s Office sa maong lungsod apan gibaoran nga dili subli-on ang ilegal nga pagpanagat sa maong lugar.