Pipila ka adlaw una pa mapusili ug namatay ang usa sa mga sibilyang naamong sa pagpamusil atol sa pagtulis sa duha ka pawnshop sa dalan Magallanes duna na kini mga “merida” nga gipakita sa iyang mga anak.
Sumala pa sa 23-anyos nga si Marichu, anak sa namatay nga si Remedeo Dungog, 56, pipila na ka adlaw ang milabay una pa ang insidente kanunay nilang madunggang daw nanamilit ang ilang amahan apan wala lang nila kini hatagi og pagtagad.
Matud pa niya nga ang ilang kinamaguwangang igsuon nga si Jose Nelson nga maoy kanunay'ng kauban niini sa ilang negosyo og tansan ug karton maoy iyang sultihan nga mao nay modumala unya sa ilang gamay'ng negosyo ug maoy paatimanon sa ilang pamilya.
Dugang pa niini mao ang gipakitang kinaiya niini nga kanunay'ng maghalog-halog sa ilang inahan nga si Belinda,55.
“Sa milabay'ng mga adlaw murag nanamilit siya namo kay magsige na siya og halog-halog sa among mama. Ang akong magulang (Jose Nelson) iyang giingnan nga ‘ikaw nay bahala sa atong negosyo ug sa imong mga igsuon’ pero gibalewala ra to namo wala mi kabalo nga maingon siya ani,” asoy pang Marichu.
Giklaro ni Marichu nga wala maningil og pautang ang iyang amahan niadtong tungura kundili nagpaabot kini kang Jose Nelson nga iyang gisugo sa Talisay aron pag-deliver sa mga tansan ug karton nga ilang gipamalit nga giingong gamiton sa usa ka pabrika sa patis ug suka.
Ang igsuon ni Dungog nga si Nilda Gaiking,51, nagkanayon nga ang Ginoo nalay bahala sa mga tulisang nakapatay sa ilang igsuon ug nanawagan sa kapolisan nga hagatan og hustisya ang kamatayon niini.
Ang banay'ng Dungog taga sitio Toril, barangay Canjulao dakbayan sa Lapulapu ug si Remedeo office staff ni Lapulapu City Mayor Arturo Radaza kinsa namatay pipila ka oras human maigo og usa ka bala diha sa dughan.
Duha sa mga gidudahang kauban sa grupo ang nangadakpan ug giilang sila si Emmanuel Alimbuyong Caraballe (dili Caraballo base sa pag-verify sa CCPO sa record nila sa Surigao) ug ingon man si Baby Toring nga taga Alumnus-Mambaling.
Samtang ang mga igsuon ug asawa ni Toring nga si Elizabeth,46, nga mipakita kagahapon og mga resibong gikatahong pagmatuod nga wala sa gihitaboan ang iyang bana kundili naa kini sa trabaho ug nag-deliver og softdrinks.
“Gusto nako dili unta iduot ang akong bana kay wala gyud na siya’y labot ana,” asoy pang Elizabeth, samtang midugang usab ang mga igsuon ni Toring nga mga lumad Basakanon silang mga Toring ug dili mga taga Mindanao sukwahi sa gibutyag sa mga polis.