2 polis probinsiya gihataga'g award

Gihatagan og award sa pangulo sa kapolisan sa probinsya sa Sugbu  ang duha ka polis nga nakadakop  sa duha ka mga lalaking nangawat og pisa diha sa provincial headquarters duha na ka semana ang nakalabay.

Sila si Supt. Erson Digal, deputy director for operation ug Supt. Noel Gillamac, deputy director for Administration sa CPPO misab-it og award nila ni SPO4 Conrado Pabillon ug PO1 Abraham De Jesus  atol sa flag raising ceremony kagahapon sa buntag .

Ang nangadakpan mao sila si Christopher Lopez Mejares nga taga barangay Papan, Sibonga ug Allan Sato nga taga Salinas drive, Lahug nga mitangtang ug mikarga sa propeller shaft sa 6X6 truck nga gi-parking sulod sa kampo niadtong kaadlawon sa Mayo 16 niining bulana.

“We recognized their efforts performing their jobs, we give commendations for arresting the suspects, paspas mi mo-disiplina sa among tawo diri ug paspas pod mi mohatag og rekomendasyon diri,” pasabot pang CPPO director Sr. Supt.  Carmelo Valmoria.

Samtang suway pagpangawat na usab diha sa kampo ang napakgang ug nadakpan ang gidudahang kawatan niadtong Domingo sa gabii nga mao si Miguel dela Cerna Babia, 34.

Kini dihang iyang gikawat ang balas diha sa construction site sa bag-ong gitukod nga CPPO building.

Si SPOI Winifredo Villabon nadestino isip camp maintenance sa Provincial Heaquarters Security Group (PHSG) nga nag-roving niadtong tungora maoy nakaakto sa suspek.