Kagawad gidunggab sa paryenteng nagmaoy

Nadunggaban ang usa ka kagawad sa barangay sa iyang paryente nga nahubog ug nagmaoy sa usa ka videokihan sa barangay Mainit siyudad sa Naga niadtong Sabado sa alas 5:30 sa hapon.

Ang biktima giila sa kapulisan nga si Mariano Navales Ave, 57,ug kagawad sa nahisgutang barangay samtang gitumbok nga midunggab niya mao si Demetrio Ebediano Inobacan, 57,ug molupyo sa nahisgutang lugar.

Matod ni PO1 Miguel Castañares dihang nahinabi sa Banat News hubog ug nagmaoy ang suspek sulod sa imnanan ug giduol ang biktima nga misusi sa dapit ug sa walay igong hinungdan gidunggab kini.

Nasagang  sa biktima ang unang pagdunggab apan ang ikaduhang hansak anha na misampak sa dughan niini.

Ang hepe sa tanod sa barangay nga diha atol sa hitabo daling nidakop sa suspek samtang ang biktima gidali og dala sa tambalanan ug luwas na hinoon sa peligro.