Mga armado nakigpinusilay sa polis

Mga armadong tawo nakigpinusilay sa mga polis niadtong Biyernes sa gabii sa barangay Cogon, lungsod sa Dumanjug usa ang nadakpan.

Ang nasikop mao si Ismael Sanapao, 37,  taga barangay Vive, lungsod sa Ronda ug nasakmitan og usa ka kalibre .357 revolver nga dunay unom ka buhing bala.

Ang kauban niining nakigpinusilay sa mga polis mao si Jik-Jik Omboy taga barangay Malalay, Borbon kinsa nakaikyas ug padayon pang gipangita sa kapolisan.

Ang hepe sa kapolisan sa Dumanjug Police Inspector Ricardo Nayne sa pakighinabi niini sa Banat News kagahapon mibutyag nga ang maong mga suspetsado adunay warrant of arrest sa kasong frustrated murder ug attempted murder niadtong tuig 2005 diha sa sala ni Regional Trial Court Juge Leopoldo Cañete sa Branch 60 sa lungsod sa Barili.

Si Nayne mibutyag nga ang barangay Cogon nagsaulog sa ilang kapistahan dihang usa sa mga residente sa lugar ang mitaho ngadto kanila kabahin sa unom ka armadong tawo nga nagkatag-katag diha sa lugar.

Sila si SPO1 Eddie Belocura ug PO3 Ferdinand Emperial ang unang miresponde sa maong alarma.

Naabtan sa maong mga polis si Sanapao nga dunay pusil hinungdan nga ilaha dayon kining gisita apan si Omboy pagkakita sa mga polis mipusil kang Belocura apan swerte nga mikagar ang armas nga kalibre .45 sa suspek.

Si Belacura daling mipasalipod ug gipusil pag-usab ni Omboy  ug ning tungura nibuto na kini hinungdan nga nahitab ang sinukliay og bala apan walay nangaigo sa maong engkwentro.

Ang kapolisan sa Dumanjug ang mipahigayon og follow-up operation ug imbestigasyon aron masikop ang mga kauban ni Sanopao.

Si SPO1 Efren Cabag, PO3 Joel Sarmiento ug PO1 Jerson Libatan miapas sa nahisgutang apan ang mga suspek daling nakaikyas.

Matud ni Nayne nga nahurot ang mga bala sa mga polis sa ilang service firearm nga kailbre .38 sa maong engkwentro.

Si Sanapao nagtingkagol karon sa Dumanjug detention cell mag-atubang sa kasong illegal possession of firearms samtang pasakaan usab nila og kasong attempted murder si Omboy.