Molugos unta sa silingan nagtingkagol

Gidakop sa kapolisan sa lungsod sa Argao ang usa ka lalaki kinsa giingong nisuway og lugos sa silingan nilang babaye sa bukirang bahin sa barangay Lapay sa nahisgutang lungsod tulo ka buwan na ang nilabay.

Ang suspek giila nga si Jelson Jangalay, 30-anyos, minyo molupyo sa nahisgutang lugar.

Ang suspek gidakop nila ni SPO2 Arnold Abenir ug PO1 Rodrigo Teo nga maoy nag-serve sa warrant of arrest niini niadtong Huwebes sa alas 12:00 sa udto.

Si Judge Maximo Perez sa Regional Trial Court Branch 26 sa lungsod sa Argao maoy niluwat sa nahisgutang WOA batok sa suspek sa kasong attempted rape.

Ang korte nitakda og P120 mil nga piyansa alang sa temporaryong kagawasan ni Jangalay.

Si Jangalay temporaryo karong nagtingkagol sa detention cell sa lungsod sa Argao samtang nagpaabot sa commitment order aron mabalhin sa Cebu Provincial Detention and Rehabilitation Center ug sa husay sa kaso niini.